Benediction Club yemejwe n’impuzamashyirahamwe y’umukino w’amagare ku isi, UCI, nk’ikipe iri ku rwego rwa Afurika, iba ikipe ya mbere yo mu Rwanda igiye muri icyo cyiciro izanaseruka muri Tour du Rwanda 2019 iyobowe na Nsengimana Jean Bosco.

Kuva tariki 24 Gashyantare kugera tariki 3 Werurwe 2019 abakunzi b’umukino wo gusiganwa ku magare bazishimira kureba isiganwa mpuzamahanga rizenguruka u Rwanda, ku nshuro ya 11.

Amakipe ari mu byiciro bitandukanye azitabira iyi Tour du Rwanda akomeje gutangaza urutonde rw’abakinnyi azajyana mu guhatanira umwenda w’umuhondo, wegukanywe ubushize na Mugisha Samuel.

Imwe mu makipe ahabwa amahirwe yo kwegukana iri siganwa ni Benediction Club yo mu Karere ka Rubavu yinjiye mu cyiciro cya gatatu (Continental teams) ku rutonde rw’amakipe azwi na UCI.

Iyi kipe itozwa na Sempoma Felix wungirije mu ikipe y’igihugu y’u Rwanda, yamaze guhindura izina. Kuva ku munsi wa mbere wa Tour du Rwanda 2019 izatangira kwitwa ‘Benediction Excel Energy Club’

Iri zina yarifashe kubera umuterankunga mukuru izaba ifite uyu mwaka, Excel Energy ltd icuruza Gas. Iyi kipe izaba yambaye umwenda uriho abandi bafatanyabikorwa barimo Inyange Industries, Rwanda Motocycle Company, Team Africa Rising, Ridley, na G skin.

Sempoma utoza Benediction Excel Energy Club yamaze gutangaza abakinnyi batanu azakoresha muri Tour du Rwanda y’uyu mwaka ibura iminsi irindwi ngo itangire.

Bayobowe na Nsengimana Jean Bosco wegukanye Tour du Rwanda na Rwanda Cycling Cup 2015 akaba n’umukinnyi wa kabiri mu mateka ya Tour du Rwanda wambaye umwenda w’umuhondo iminsi myinshi (umunani) akurikiye Valens Ndayisenga wambaye uyu mwenda iminsi 12 mu myaka itandukanye.

Nsengimana azaba afatanya n’abandi barimo Kapiteni w’iyi kipe Byukusenge Patrick wegukanye Rwanda Cycling Cup 2017, Bonaventure Uwizeyimana wegukanye shampiyona y’u Rwanda 2016, Didier Munyaneza wegukanye Shampiyona y’u Rwanda 2018 n’umukinnyi ukizamuka, Manizabayo Eric w’imyaka 19.

 

Benediction Club izaba iyobowe na Nsengimana Jean Bosco wegukanye Tour du Rwanda 2015

 

Benediction Excel Energy Club izakina Tour du Rwanda igizwe na (uhereye ibumoso) Manizabayo, Nsengimana, Uwizeyimana, Byukusenge na Munyaneza

 

Jean Bosco Nsengimana ni umukinnyi wa kabiri umaze gukina iminsi myinshi (8) yambaye umwenda w’umuhondo mu mateka ya Tour du Rwanda

 

TANGA IGITEKEREZO

Andika igitekerezo cyawe hano
Andika amazina yawe hano