RDC: Perezida Tshisekedi yagiranye ibiganiro na Kabila murugo rwe ku gushyiraho guverinoma nshya

0
3

Perezida wa Repubulika Iharanira Demukarasi ya Congo, Félix Tshisekedi, yagiranye ibiganiro na Joseph Kabila yasimbuye, byibanze ku gushyiraho guverinoma ihuriweho n’amashyaka atandukanye muri iki gihugu.

Kuri iki Cyumweru tariki 17 Gashyantare 2019 nibwo Kabila uyoboye ishyaka PPRD (Parti du peuple pour la reconstruction et la démocratie) rifite ubwiganze mu Nteko Ishinga Amategeko, yagiranye ibiganiro n’uwamusimbuye ngo barebere hamwe uko hashyirwaho guverinoma ihuriweho.

Umwe mu bantu ba hafi utashatse ko imyirondoro ye itangazwa yabwiye AFP ko “Ibi biganiro bigamije guharura amayira ku ishyirwaho ry’uzahabwa inshingano cyangwa Minisitiri w’Intebe uzagena abagize guverinoma ihuriweho, mu gufatanya kuyobora igihugu.”

Ibiganiro hagati ya Kabila na Tshisekedi byemejwe n’ibiro by’umuru w’igihugu byatangaje ko aba bagabo babiri banasangiye ifunguro mu rwego rw’umuryango.

Nk’uko bigaragazwa mu majwi y’agateganyo y’ibyavuye mu matora yo ku wa 30 Ukuboza 2018, abo mu ishyaka rya Kabila batsindiye imyanya 337 mu 485 y’Inteko Ishinga Amategeko. Ishyaka UDPS riyoborwa na Tshisekedi ryo ryatsindiye imyanya 32 mu Nteko.

Kuva RDC yabona ubwigenge mu 1960, ni ubwa mbere habayeho guhererekanya ubutegetsi mu mahoro. Kabila yatanze ubutegetsi nyuma y’imyaka 17 ari perezida w’icyo gihugu.

Ibiganiro bya bombi biganisha ku ishyirwaho rya guverinoma ihuriweho

Perezida Tshisekedi yakiriye Kabila iwe mu rugo bagirana ibiganiro byihariye

TANGA IGITEKEREZO

Andika igitekerezo cyawe hano
Andika amazina yawe hano