Umuhanzikazi Robyn Rihanna Fenty uzwi mu muziki nka Rihanna yisunze Sosiyete ya LVMH [LVMH Moët Hennessy – Louis Vuitton SE], izamufasha kwagura ibikorwa by’ikompanyi ye y’imideli ya Fenty.

Ku wa Gatanu uyu muhanzikazi yatangaje ko agiye kwagura ibikorwa bye by’imideli afatanyije n’iyi kompanyi y’Abafaransa imaze kubaka izina.

Mu itangazo rigenewe abanyamakuru ryashyizwe hanze rigaragaza ko Fenty ari ikompanyi ya Rihanna, ndetse ikaba ijyanye n’icyekerezo cye. Rivuga ko yiteguye kwambara inkweto n’ibindi bintu byerekeranye no kuyamamaza.

New York Times yatangaje ko ariwe mukobwa ufite uruhu rwirabura wa mbere uzaba agize ikompanyi muri LVMH ndetse ni nabwo hazaba hahanzwe umurongo mushya uyishamikiyeho nyuma ya Christian Lacroix yaherukaga mu 1987.

Fenty ije nyuma y’ibindi bicuruzwa byubatse izina Rihanna yari yarashyize hanze mu myaka ishize birimo Fenty Beauty ijyanye n’ibikoresho byongera ubwiza na Savage X Fenty ikora ibijyanye n’imyenda y’imbere, kimwe cyagiye hanze mu 2017 ikindi mu 2018.

Ibicuruzwa bya Fenty Beauty byinjije miliyoni £431 mu mwaka wa 2018.

Rihanna yavuze ko yishimiye ubufatanye bwe na LVMH ndetse ashimangira ko ari amahirwe ahambaye kuri we.

Arakomeza ati “Ntabwo niyumvishaga ko nakorana n’abantu nk’aba basobanutse mu bijyanye no guhanga udushya ndetse no mu kibuga cy’ubushabitsi.”

Rihanna yerekanye ikirango cya Fenty ku rubuga rwa Instagram avuga ko ari umunsi ukomeye kuri we ashimira Arnault uyobora LVMH ku kuba baramugiriye icyizere bakamuha amahirwe yo kuzamuka, avuga ko byerekana ko nta kidashoboka.

Umuyobozi wa LVMH, Arnault, yavuze ko buri wese azi Rihanna nk’umuhanzikazi mwiza akomeza avuga ko binyuze mu bufatanye bagiye kugirana yamubonyemo umushabitsi nyakuri kandi akaba umuyobozi uhamye.

Akomeza agira ati “Gufasha Rihanna gutangiza iyi nzu ye ya Fenty, twubatse ikipe ifite byinshi bizayifasha. Ntewe ishema no kuba LVMH igiye gukurikirana ibikorwa by’iyi kompanyi ye kandi ndifuza ko izaba intsinzi ikomeye.”

Rihanna akunze gukora ibikorwa bijyanye n’imideli kuko afatanyije n’uruganda rwa Puma yigeze gukora imyambaro yari yahawe inyito ya ‘Fenty For Puma’ yari ibumbiye hamwe ikubiyemo iy’abagore n’abagabo bambara bagiye mu birori, inkweto zigezweho n’imirimbo.

Rihanna ari mu bahanzikazi bakomeye bafite ibikorwa bifatika muri Amerika

Mu 2016 Rihanna yashyize ahagaragara imideli y’icyiciro cya kabiri cya Fenty For Puma mu birori byo kumurika imideli mu Mujyi wa Paris

Rihanna asanzwe akora ibikorwa bijyanye n’imideli. Mu 2017 yamuritse imideli mu buryo bwatunguye benshi mu bitabiriye icyumweru cyahariwe imideli mu Mujyi wa New York


TANGA IGITEKEREZO

Andika igitekerezo cyawe hano
Andika amazina yawe hano